13.04.23

Årsmøte blir torsdag 27.april 2023 kl 19 på Førde Samfunnshus.
Saker som medlemmer vil ta opp på årsmøtet, må meldast til styret innan mandag 24. april.

Årsmøtedokumenta er oppdatert og kan finnast i menyen til høgre.

---

27.03.23



Førstkomande helg blir det sesongopning for årets turorientering i mange delar av Sveio kommune. Sveio O-lag har gjennom fleire månader førebudd sesongen. 80 postar er nå sett ut i skog og mark, frå nord til sør.

På sørsida av Mølstrevågen, mellom Skålaskog og Avløype, har Sveio O-lag aldri tidlegare plassert tur-o-postar. I dette opne og småkuperte terrenget får du utsyn langt vestover i havet frå enkelte høgt plasserte tur-o-postar.
På nordsida av Mølstrevågen er ny tursti er blitt rydda og merka, i terrenget mellom sjøen og vegen som går vestover til Ryvarden fyr. I dette lette terrenget finn du i år 15 tur-o-postar som du kan besøkja. Nede ved fjorden passerer du framom eit gamalt steinbrot kor fundamentet til rådhuset i Haugesund vart teken ut for snart 100 år sidan. I dette gamle steinbrotet er det sett ut bord og kvilebenker saman med infotavler som fortel historia.

Langs nye stiar
Den nye turstien frå Drange til Storestraumen ved Rødspollen blir i år for første gong ledetråd for tur-o-postar. Stien går gjennom vekslande terreng, mellom skogholt, over myrar, høgdedrag og til dels ope landskap og fram til rasteplassen der Rødspollen er på sitt smalaste.
Dagsturhytta, Nipaståvo, kan også i denne sesongen vera utgangspunkt for spennande postjakt i terrenget mellom Tjernagel, Åsbu og Auklandshamn. Frå stien sørover mot Slettafjellet, ber det vidare til topps på Tindafjellet.

Start-pakke
For dei yngste og for vaksne som vil prøva turorientering for første gong, har Sveio O-lag lagt opp fire enklare o-løyper fordelt på like mange tur-område. Lengst i nord ved Valevåg i Eivindsmarka kan du langs gode turstiar utforska eit spennande terreng med friskt rennande vatn, leikeapparat og naturstiar som er tilrettelagt av Valestrand skule.
Ved Auklandshamn ligg postar nær skulen og langs stien i retning Nipaståvo. I Førde ligg postane langs den nye skogsvegen frå samfunnshuset og austover gjennom Solheimsdalen. Aust for Fjellstad ligg nærtrim-postane like ved Paddevegen.
Alle som kjøper årets tur-o-mapper med kart og info-materiell, får samtidig ein kode som gjer at alle årets kart fritt kan lastast ned til PC og til mobiltelefon. Kvart postbesøk kan dessutan registrerast umiddelbart ved å skanna ei QR-kode til mobiltelefonen.
Kart og deltakarkort kan kjøpast hos Haukås bensinstasjon, hos Joker Førde og i daglegvarebutikken i Valevåg.

---

04.11.22



Årsfest for avslutning av Turo-sesongen 2022 på Førde Samfunnshus 10. november kl 18:30.
Med utdeling av årets merker, plaketter og premier. Det blir underhaldning og utlodding med servering.

Vel møtt

---

24.08.22


I det idylliske friluftsområdet langs stranda og i Rex Garden i Førde inviterer Sveio O-lag til årets Finn Fram dag søndag 28. august.
Alle besøkjande vil få tilbod om eit kart over området med innteikna postar kor ein kan prøva seg på ymse aktiviteter og utfordringar. I år blir det tilbod om kajakkpadling luftgeverskyting, pilkast, spikerslag, speed-orientering, bruk av kart og kompass, kviss og ikkje minst kåring av søndagens sterkaste kvinne og mann. Arrangørane lovar premiering i alle konkurransar.
I grillhytta blir det sal av pølser, vafler, kaker, saft og kaffi.
Sveio Orienteringslag er hovedarrangør denne søndagen, men har fått med seg Sveio Turlag, Førde-speidarane, Bua-speidarane og Lid 4H.

---

28.07.22


I alt 14 slike lett tilgjengelege stolpar, med raud og kvit topp, er plassert ut; sju i Førde sentrum og sju ved Fjellstad nær Sveio sentrum. På kvar stolpepost finn du posten sitt nummer og bokstavkode saman med èin QR-kode, som du kan lesa av med Turorienterings-appen på mobiltelefonen. Du kan og notera ned bokstavkoden og registrera ditt postbesøk på nettsida eller ved å senda inn alle kodane noterte på kartet. Kartet lastar du ned gratis frå Sveio O-lag si side hos turorientering.no/sveio. Særskilt premiering for alle som registrerer besøk på Sommarpostane. God tur!

---