27.03.23


Førstkomande helg blir det sesongopning for årets turorientering i mange delar av Sveio kommune. Sveio O-lag har gjennom fleire månader førebudd sesongen. 80 postar er nå sett ut i skog og mark, frå nord til sør.

På sørsida av Mølstrevågen, mellom Skålaskog og Avløype, har Sveio O-lag aldri tidlegare plassert tur-o-postar. I dette opne og småkuperte terrenget får du utsyn langt vestover i havet frå enkelte høgt plasserte tur-o-postar.
På nordsida av Mølstrevågen er ny tursti er blitt rydda og merka, i terrenget mellom sjøen og vegen som går vestover til Ryvarden fyr. I dette lette terrenget finn du i år 15 tur-o-postar som du kan besøkja. Nede ved fjorden passerer du framom eit gamalt steinbrot kor fundamentet til rådhuset i Haugesund vart teken ut for snart 100 år sidan. I dette gamle steinbrotet er det sett ut bord og kvilebenker saman med infotavler som fortel historia.

Langs nye stiar
Den nye turstien frå Drange til Storestraumen ved Rødspollen blir i år for første gong ledetråd for tur-o-postar. Stien går gjennom vekslande terreng, mellom skogholt, over myrar, høgdedrag og til dels ope landskap og fram til rasteplassen der Rødspollen er på sitt smalaste.
Dagsturhytta, Nipaståvo, kan også i denne sesongen vera utgangspunkt for spennande postjakt i terrenget mellom Tjernagel, Åsbu og Auklandshamn. Frå stien sørover mot Slettafjellet, ber det vidare til topps på Tindafjellet.

Start-pakke
For dei yngste og for vaksne som vil prøva turorientering for første gong, har Sveio O-lag lagt opp fire enklare o-løyper fordelt på like mange tur-område. Lengst i nord ved Valevåg i Eivindsmarka kan du langs gode turstiar utforska eit spennande terreng med friskt rennande vatn, leikeapparat og naturstiar som er tilrettelagt av Valestrand skule.
Ved Auklandshamn ligg postar nær skulen og langs stien i retning Nipaståvo. I Førde ligg postane langs den nye skogsvegen frå samfunnshuset og austover gjennom Solheimsdalen. Aust for Fjellstad ligg nærtrim-postane like ved Paddevegen.
Alle som kjøper årets tur-o-mapper med kart og info-materiell, får samtidig ein kode som gjer at alle årets kart fritt kan lastast ned til PC og til mobiltelefon. Kvart postbesøk kan dessutan registrerast umiddelbart ved å skanna ei QR-kode til mobiltelefonen.
Kart og deltakarkort kan kjøpast hos Haukås bensinstasjon, hos Joker Førde og i daglegvarebutikken i Valevåg.

---

04.11.22


Årsfest for avslutning av Turo-sesongen 2022 på Førde Samfunnshus 10. november kl 18:30.
Med utdeling av årets merker, plaketter og premier. Det blir underhaldning og utlodding med servering.

Vel møtt

---

28.07.22

I alt 14 slike lett tilgjengelege stolpar, med raud og kvit topp, er plassert ut; sju i Førde sentrum og sju ved Fjellstad nær Sveio sentrum. På kvar stolpepost finn du posten sitt nummer og bokstavkode saman med èin QR-kode, som du kan lesa av med Turorienterings-appen på mobiltelefonen. Du kan og notera ned bokstavkoden og registrera ditt postbesøk på nettsida eller ved å senda inn alle kodane noterte på kartet. Kartet lastar du ned gratis frå Sveio O-lag si side hos turorientering.no/sveio. Særskilt premiering for alle som registrerer besøk på Sommarpostane. God tur!

---

29.03.22

Førstkomande helg blir det sesongopning for årets turorientering i mange delar av kommunen. Sveio O-lag har gjennom fleire månader førebudd sesongen. Nær 100 postar er nå sett ut i skog og mark, frå nord til sør.
Den populære turstien langs Bjellandselvo blir i år for første gong ledetråd for tur-o-postar. Stien går gjennom vekslande, slakt terreng, mellom skogholt, brusande elv , høgdedrag og ope landskap. Ved eit fossefall i elva finst m.a. restar etter ei gamal stampe. Vel framme ved Vigdarvatnet har du passert 10 tur-o-postar og kan nyta nista under tak i ein flott gapahuk med utsyn over vatnet.

Dagsturhytta, Nipaståvo, er eit anna populært turmål, som blir omkransa av tur-o-postar denne sesongen. Ein særs innhaldsrik tur startar frå Eikeland kapell. Postar er plasserte ut i terrenget langs den mykje brukte stien som går oppover mot Mjuko og fram til Nipaståvo. Fleire fantastisk fine utsiktspunkt undervegs. Frå Nipaståvo er det laga ein rundtur med postar vidare vestover og tilbake til stien mellom Auklandshamn skule og Nipaståvo.

Vikse - Mørkavatnet
Godt tilrettelagde turområde finst det fleire av i området Vikse-Straumen-Mørkavatnet. Denne sesongen startar rundløypa med tur-o-postar på same staden som i fjor, p-plassen ved Fantahytta. Men rundløypa i år går lenger nordover og rundt Mørkavatnet og kjem tilbake langs ryggen mellom Mørkavatnet og Staumsvollvatnet.
Ny tursti er blitt rydda rundt Kværnavatnet, mellom Mølstrevåg og Ryvarden. Denne stien har Sveio O-lag i år nytta som utgangspunkt for å plassering av tur-o-postar, som utgjer ein spennande rundtur rundt vatnet.
Dessutan er det lagt ut mange postar i området mellom Fjellstad- Krossleite og Furevatnet. Ein fin plass å starta kan vera på ein godt merka sti som startar ved Krossleite.

Start-pakke
For dei yngste og for vaksne som vil prøva turorientering for første gong, har Sveio O-lag lagt opp fire enklare o-løyper fordelt på like mange tur-område. Lengst i nord på Tittelsnes kan du utforska spennande tunnelar og gangar på Festningen. Ved Auklandshamn ligg postar i det vakre friområdet Slettene. I Førde ligg postane langs turvegar nær skulen og i Sveio nær Paddevegen.
Alle som kjøper årets tur-o-mapper med kart og info-materlell, får samtidig ein kode som gjer at alle årets kart fritt kan lastast ned til PC og til mobiltelefon. Kvart postbesøk kan dessutan registrerast umiddelbart ved å skanna ei QR-kode til mobiltelefonen.

---

30.11.21

Då årets tur-o-sesong kunne summerast opp, viste det seg at 14 flittige deltakarar hadde gjort seg fortent til plakett av ymse valørar.

Under Sveio O-lag sin årsfest nyleg i Førde Samfunnshus, kunne i alt 14 plakettvinnarar ta imot sin heiderspris. Tre av dei aller flittigaste veteranane, Eva Lokna, Lilly Krunenes og Svein Krunenes gjekk alle i år til gullmerke i sine 25. sesongar på rad. Det betyr i praksis at dei tre fortenestefulle vinnarane har besøkt minst 50 postar i skog og mark kvart år gjennom 25 sesongar.
To andre blant veteranane, Edith og Anders Bergmål, blei tildelt kvar sin plakett for å ha oppnådd gullmerket i turorientering 20 sesongar på rad. I tillegg kunne fire ihuga post-jegerar motta sølvplakettar for 10 sesongar med vellukka gullmerke-jakt. Fem deltakarar blei tildelt kvar sin bronseplakett for fem sesongar med gullmerke.
Sveio O-lag kunne oppsummera og feira enda ein særs velluka tur-o-sesong, der over 160 deltakarar har registrert seg som aktive, enten via nettportal eller ved å senda inn deltakarkort på papir. 85 av desse besøkte i løpet av sesongen meir enn 50 ulike postar og gjorde seg dermed fortente til å kunne ta imot årets gullmerke.
Nær 200 pakkar med kart og langt over 100 innteikna postar blei selde i løpet av årets sesong. Alle desse tala utgjer rekordar når det gjeld oppslutnad om Sveio O-lag sitt tur-o-tilbod.
Mellom deltakarane i årets tilbod, Nærtrim/Barna Tur-o, var det 30 deltakarar som besøkte alle dei 20 postane som var fordelte på fire ulike kart og nærområde.
Merkevinnarar 2021

---